வெந்தய விதைகள் அல்லது மெத்தி டானா பொதுவாக பல இந்திய உணவு வகைகளில் சுவையூட்டும் அல்லது மென்மையாக்கும் பொருளாகப் பயன்படுத்தப்படுகிறது. நார்ச்சத்து, இரும்புச் சத்து மற்றும் மாங்கனீஸ் போன்ற தாதுக்கள் நிறைந்த, நார்ச்சத்து நிறைந்த பொதுவான வீட்டு மசாலா. வெந்தய விதைகளை தினசரி உணவில் சேர்த்துக்கொள்வது இரத்தத்தில் உள்ள சர்க்கரையின் அளவைக் குறைக்க உதவும் என்று ஆராய்ச்சி சுட்டிக்காட்டுகிறது.

கேரளாவைச் சேர்ந்த ஓர் இல்லத்தரசியான சுனிலா சங்கர், தனது 84 வயதான மாமனார் பெற்ற பலனைப் பார்த்த பிறகு தினமும் காலையில் மெத்தி விதைகளைச் சாப்பிட ஆரம்பித்ததாகக் கூறுகிறார்.

“நீரிழிவு நோயால் பாதிக்கப்பட்ட என் மாமனார், சர்க்கரையின் அளவு சீராக இருப்பதை உறுதி செய்வதற்காகப் பழங்களை உட்கொள்ளும் நாட்களில் வெந்தய விதைகளை எப்போதும் சாப்பிடுவதை வழக்கமாகக் கொண்டிருக்கிறார். அவர் மற்ற நாட்களில் கடுமையான நீரிழிவுக்கான உணவைக் கடைப்பிடிப்பார், ”என்று அவர் விளக்குகிறார்.

வெந்தய விதைகளின் ஆரோக்கிய நன்மைகளை அனுபவிக்க விரும்பிய சங்கர், அவற்றை உட்கொள்வதால் தனது அதிகாலை பசியைக் கட்டுப்படுத்த உதவியாக இருந்ததாகக் கருதினார். “இது என்னை இஷ்டத்திற்குச் சாப்பிடுவதைத் தடுக்கிறது மற்றும் எனது எடை மற்றும் லிப்பிட் ப்ரொஃபைலை நிர்வகிக்க எனக்கு உதவியது,” என்று அவர் கூறுகிறார்.

வெந்தயம் மற்றும் இரத்த சர்க்கரை அளவுகளுக்கு இடையிலான தொடர்பு

பெங்களூரு பன்னர்கட்டா சாலையில் உள்ள ஃபோர்டிஸ் மருத்துவமனையின் உட்சுரப்பியல் துறையின் இணை ஆலோசகர் டாக்டர் அனுஷா நாடிக் கூறுகையில், வெந்தயத்தின் தனித்துவமான ஊட்டச்சத்து மற்றும் மருத்துவக் குணங்கள் இன்சுலின் உணர்திறனை மேம்படுத்துவதன் மூலம் நீரிழிவைக் கட்டுப்படுத்த உதவும் என்று பல ஆய்வுகள் கண்டறிந்துள்ளன என்கிறார். மேலும் அவர் “விதைகளில் உள்ள நார்ச்சத்து கார்போஹைட்ரேட் உறிஞ்சுதலைக் குறைக்க உதவுகிறது, இரத்த சர்க்கரை அளவைக் கட்டுப்படுத்துகிறது மற்றும் இன்சுலின் உணர்திறனை மேம்படுத்துகிறது,” என்று கூறுகிறார்.

நீரிழிவு மற்றும் வளர்சிதை மாற்றக் கோளாறுகள் தொடர்பான இதழில் வெளியிடப்பட்ட ஒரு ஆய்வுக் கட்டுரையின்படி, ப்ரீ-டயாபட்டீஸ் உள்ளவர்கள் ஒரு நாளைக்கு 10 கிராம் வெந்தயத்தை உணவில் சேர்த்துக்கொள்வது, எந்தப் பாதகமான விளைவுகளும் இல்லாமல் நீரிழிவு நோயைக் கட்டுப்படுத்துவதற்கு வழிவகுக்கிறது.

நீரிழிவைக் கட்டுப்படுத்துவதற்காக வெந்தய விதைகளை உட்கொள்பவர்கள் உணவுக்குப் பின் இரத்தத்தில் சர்க்கரையின் அதிகரிப்பு குறைவதை கவனிப்பார்கள் என்று டாக்டர் நாடிக் கூறுகிறார். மேலும் அவர் “உங்கள் இரத்த சர்க்கரை அளவு அவற்றால் எப்படிக் குறைகிறது என்பதை அறிய இது உதவுகிறது,” என்று கூறுகிறார்.

பெங்களூரைச் சேர்ந்த நீரிழிவு நிபுணர் டாக்டர் அஷ்விதா ஸ்ருதி தாஸின் கூற்றுப்படி, அவரைக் கலந்தாலோசிப்பவர்கள் இரத்தத்தில் உள்ள சர்க்கரை அளவைக் கட்டுப்படுத்த ஊறவைத்த வெந்தய விதைகளை உட்கொள்வதால் ஏற்படும் நன்மைகளுக்கு அடிக்கடி உறுதியளிக்கிறார்கள். இருப்பினும், இன்சுலின் அல்லது பிற மருந்துகளுக்கு மாற்றாக வெந்தயத்தை அவர் பரிந்துரைக்கவில்லை.

பெங்களூரில் உள்ள ஆஸ்டர் ஆர்.வி மருத்துவமனையின் தலைமை ஊட்டச்சத்து நிபுணர் சௌமிதா பிஸ்வாஸ் கூறுகையில், இந்தச் சிறிய கசப்பு சுவை கொண்ட விதைகள் இரத்த சர்க்கரை அளவைப் பராமரிக்க உதவுவது மட்டுமல்லாமல், அழற்சி எதிர்ப்புப் பண்புகளைக் கொண்ட ஃபிளாவனாய்டுகளைக் கொண்டிருப்பதால் ஆக்ஸிஜனேற்ற அழுத்தத்தையும் குறைக்கிறது என்கிறார்.

மேலும் அவர் “நார்ச் சத்தானது கொலஸ்ட்ரால் அளவைக் கட்டுப்படுத்த உதவுகிறது மற்றும் எடை இழப்புக்கு உதவுகிறது,” என்று கூறுகிறார்.

பாலூட்டும் தாய்மார்களுக்கு, வெந்தய விதைப் பொடியை ராகி மற்றும் குவார் கம் (பருப்பு வகைகளின் விதைகளில் இருந்து தயாரிக்கப்படும் ஒரு தூள் உணவு சேர்க்கை) சேர்த்து லட்டுகளைத் தயாரிக்கலாம். “இது ஒரு சிறந்த கேலக்டாகோக் (தாய்ப்பால் உற்பத்தியை அதிகரிக்க உதவும் உணவுகள்) போல் செயல்படுகிறது, இது ஊட்டச்சத்து நிறைந்தது மற்றும் ஆரோக்கியமானது” என்று பிஸ்வாஸ் விளக்குகிறார்.

வெந்தயத்தின் ஊட்டச்சத்து மதிப்பு

பிஸ்வாஸின் கூற்றுப்படி, சுமார் 100 கிராம் வெந்தய விதைகளில் 323 கிலோகலோரி (கிலோகலோரிகள்), 58 சதவீதம் கார்போஹைட்ரேட் மற்றும் 23 சதவீதம் புரதம் உள்ளது.

100 கிராம் வெந்தய விதையில் 25 கிராம் வரை உணவு நார்ச்சத்து உள்ளது என்று டாக்டர் நாடிக் விளக்குகிறார். கூடுதலாக, அவற்றில் வைட்டமின்கள் (வைட்டமின் A, B மற்றும் C போன்றவை) மற்றும் தாதுக்கள் (இரும்பு, மெக்னீசியம், பொட்டாசியம், துத்தநாகம் மற்றும் கால்சியம் போன்றவை) நிறைந்துள்ளன.

“ஒரு நாளைக்கு ஒரு டீஸ்பூன் வெந்தய விதைகளை எடுத்துக்கொள்ளலாம்” என்கிறார் பிஸ்வாஸ்.

வெந்தயத்தை உட்கொள்ளுதல்: எச்சரிக்கையுடன் செயல்படவும்

வெந்தயம் நிறைய ஆரோக்கிய நன்மைகளை அளிக்கும் அதே வேளையில், சில சந்தர்ப்பங்களில் அது எதிர்மறையான விளைவையும் ஏற்படுத்தும். சிலருக்கு வெந்தயத்தால் செரிமானப் பிரச்சனைகளை எதிர்கொள்கின்றனர், எனவே அது உங்களுக்குப் பொருந்துகிறதா என்பதைச் சரிபார்க்க சிறிய அளவிலேயே தொடங்குவது நல்லது.

இரத்தத்தை மெலிக்கும் (வார்ஃபரின் போன்றவை) அல்லது ஆன்டிபிளேட்லெட் மருந்துகளை உட்கொள்பவர்கள் வெந்தய விதைகளைப் பயன்படுத்த பரிந்துரைக்கப்படுவதில்லை, ஏனெனில் அந்த மருந்துகளுடன் ஏற்படும் ரியாக்ஷன்கள் காரணமாக அவர்கள் சிக்கல்களை எதிர்கொள்ளலாம்.

கர்ப்பிணிப் பெண்கள் வெந்தய விதைகளை சாப்பிடக்கூடாது என்று டாக்டர் நாடிக் எச்சரிக்கிறார், ஏனெனில் அவை குறைப்பிரசவத்தை ஏற்படுத்தும். கூடுதலாக, நீரிழிவு இருந்து தாய்ப்பால் கொடுக்கும் பெண்கள் அவற்றை உட்கொள்ளும் முன் தங்கள் மருத்துவர் அல்லது ஊட்டச்சத்து நிபுணரை அணுக வேண்டும். நீரிழிவு நோயாளிகள் இந்த விதைகளை அதிகமாக உட்கொள்வது இரத்தச் சர்க்கரைக் குறைவை ஏற்படுத்தும்.

வெந்தயம் சிலருக்கு ஒவ்வாமை எதிர்வினையையும் தூண்டலாம், மேலும் குடல் பிரச்சினைகள் உள்ளவர்களுக்கு இந்த விதைகள் பொருத்தமற்றதாக இருந்தால் அவற்றைத் தவிர்க்க வேண்டும்.

வெந்தயத்தை உட்கொள்ளும் முறைகள்

முளைத்த வெந்தய விதைகளை கறிகளில் பயன்படுத்தலாம் அல்லது சாலடுகள் மற்றும் சூப்களில் சேர்க்கலாம்.

“வெறுமனே, விதைகளை ஒரே இரவில் ஊறவைக்கலாம், இது அவற்றின் கசப்பைக் குறைத்து, காலையில் சாப்பிடுவதற்கு மென்மையாக்க உதவுகிறது” என்று டாக்டர் நாடிக் விளக்குகிறார். விதைகளை ஊறவைப்பது ஊட்டச்சத்துக்களை சிறப்பாக உறிஞ்சுவதற்கு உதவுகிறது என்று பிஸ்வாஸ் கூறுகிறார். வெந்தயத்தை அதில் இருந்து தேநீர் காய்ச்சுவதன் மூலமும் உட்கொள்ளலாம்.

கூடுதலாக, விதைகளை மசாலா மற்றும் புதிய தேங்காயுடன் கலந்து சட்னி செய்யலாம். வெந்தய விதைகளைச் சிக்கலான கார்போஹைட்ரேட்டுகள் அல்லது சில அரிசி தயாரிப்புகளுடன் இணைக்கலாம். இருப்பினும், அவற்றை மிதமாக உட்கொள்ள வேண்டும். “பழங்கள் மற்றும் காய்கறிகள் அடங்கிய சாலட்கள் மீது நீங்கள் மெத்தி பொடியைத் தூவலாம்” என்று டாக்டர் நாடிக் கூறுகிறார்.

தெரிந்துகொள்ள வேண்டியவை

• வெந்தய விதைகள் அல்லது மெத்தி தானாவை உணவில் சேர்த்துக்கொள்வது செரிமானத்தை மெதுவாக்குகிறது மற்றும் கார்போஹைட்ரேட்டையும் சர்க்கரையையும் உறிஞ்சுவதைத் தாமதப்படுத்துகிறது, இதனால் நீரிழிவைக் கட்டுக்குள் வைக்க உதவுகிறது.

• வெந்தயத்தை உட்கொள்ளும் போது இரத்தச் சர்க்கரை அளவைக் கண்காணிப்பது மிகவும் முக்கியமானது, இதனால் இரத்தச் சர்க்கரைக் குறைவு ஏற்படாது.
• வெந்தய விதைகளைக் குழம்புகளில் பயன்படுத்தலாம் அல்லது சாலடுகள் மற்றும் சூப்களில் சேர்க்கலாம். இரத்தத்தில் உள்ள சர்க்கரையின் அளவைக் கட்டுப்படுத்த அவற்றைத் தண்ணீரில் ஊறவைத்து, பொடி செய்து அல்லது தேநீரில் சேர்த்துக் கொள்ளலாம்.